WAR-MURTIYEED
Maanta oo ay taariikhdu tahay 30-ka Abriil 2025, waxaa soo gaba-gaboobay Shirweynaha 7aad ee dib u eegista waxbarashada Puntland, kaas oo ay soo agaasintay Wasaaradda Waxbarashada iyo Tacliinta Sare ee Puntland, kuna qabsoomay magaalada Garoowe 29-kii ilaa 30ka Abriil 2025.
Shirkan oo ay ka soo qeyb-galeen; Madaxweyne Kuxigeenka Dowladda Puntland Mudane Ilyaas Cismaan Lugatoor, Guddoomiye Kuxigeenka 2-aad ee Baarlamaanka Puntland Mudane Maxamed Maxamuud Ciise, Wasiirrada Dowladda Puntland ee; Qorsheynta iyo Maalgashiga, Haweenka iyo Horumarinta Arrimaha Qoyska iyo Wasiirru-dowlaha Maaliyadda, Guddoomiyaha Guddiga Guddiga Arrimaha Bulshada ee Golaha Wakiillada Puntland Mudane Cabdicasiis Axmed Saalax, Guddoonnada heer gobol iyo heer degmo ee waxbarashada Puntland, khubarada iyo daneeyeyaasha caalamiga ah ee waxbarashada iyo guud ahaan bahda waxbarasahda aas-aasiga ah iyo tacliinta sare ee Puntland.
Madasha 7aad ee dib u eegista waxbarashada Puntland oo hal ku dhigiisu ahaa “Joogtaynta Horumarinta Waxbarashada iyo Xirfadaha” ayaa waxaa lagu lafa-guray guulihii waxbarashada Puntland, caqabadaha iyo fursadaha muddadii u dhexaysay 2023-2024.
Shirweynuhu waxa uu qiimeeyay guulaha laga gaaray Qorshaha Istaraatiijiyadeed ee Qaybaha Waxbarashada Puntland (ESSP 2023-2027) gaar ahaan dhinacyada kala ah; kororka tirada ardayda, tababarka macalimiinta, horumarinta kaabeyaasha waxbarashada, qiimeynta natiijada imitixaanaadka, maalgelinta iyo xoojinta nidaamka waxbarashada.
Shirka ayaa lagu bogaadiyey qorsheyaashii hirgalay Labadii sano ee la soo dhaafay 2023-2024, iyadoo la isla qaatay muhiimadda ay leedahay dhammaystirka iyo ballaarinta hannaanka diiwaan-gelinta iyo kaydinta xogta ardayda, xoojinta wacyigelinta iyo kor u qaadidda u qareemidda maalgashiga waxbarasahda, hirgelinta Sanduuqa Waxbarashada Puntland, kordhinta dugsiyada sare ee xirfadda iyo farsamada gacanta, ballaarinta hannaanka dib u eegista manhajka, imtixaanaadka, deeqaha iyo adeegyada waxbarashada, kordhinta tababarrada macallimiinta iyo kor u qaadidda tirada Ubadka ka faaíideysta fursadaha waxbarashada, i yadoo 67% carruurta Puntland ee gaaray da’da waxbarashada ay ka maqanyihiin iskuullada.
Khubarada iyo daneeyeyaasha Waxbarashada Puntland ayaa yeeshay doodo iyo xog-iswaaydaarsi ku saabsanaa;
1. Carruurta ka maqan goobaha waxbarashada ee gaarey da’da waxbarashada.
2. Tirada macallimiinta dumarka ah oo aad u yar, markii loo eego tirada guud ee Bareyaasha Puntland.
3. Maalgelinta Waxbarashada iyo doorka dowladdu ay ku leedahay.
4. Sababaha keena in Ardaydu ay ku hooseeyaan Natiijooyinka imtixaanaadka maaddooyinka Sayniska ah.
Wasaaradda Waxbarashada iyo Tacliinta Sare iyo baahwadaagta waxbarashada waxay isla qaateen:
• Kor u qaadista maalgashiga waxbarashada, iyadoo la hirgelinayo Sanduuqa Horumarinta Waxbarashada Puntland.
• In la kordhiyo tirada carruurta ka faaíideysanaysa waxbarashada aas-aasiga ah, iyadoo kor loo qaadaayo tirada guud ee carruurta helaya waxbarashada 2% sanadkiiba.
• Kordhinta tirada macallimiinta Haweenka ah ee ka howl-gala dugsiyada Puntland.
• In la horumariyo Dugsiyada Sare ee Farsamada Gacanta, waxbarashada dadka waaweyn iyo xarummaha xirfadaha, si looga jawaabo baahiyaha suuqa iyo shaqo laáanta dhallinyarada.
Ugu danbeyntii, Wasaaradda Waxbarashada iyo Tacliinta Sare ee Puntland waxa ay u mahadcelineysaa dhammaan ka soo qaybgalayaasha shirweynahan, iyadoo ku bogaadinaysa bahwadaagta waxbarashada iyo deeq-bixiyeyaasha doorka ay ka qaateen qabsoomidda Shirweynaha 7aad ee Dib u eegista Waxbarashada Puntland iyo guud ahaan horumarinta adeegyada waxbarashada.
Mahadsanidiin
